Nəqliyyat qəzaları zamanı yaranan fövqəladə hallar və onların idarə olunması

Nəqliyyat qəzaları zamanı yaranan fövqəladə hallar və onların idarə olunması

Azərbaycan Memarlıq və İnşaat Universitetində ulu öndər Heydər Əliyevin anadan olmasının 100 illiyinə həsr olunmuş “Nəqliyyat qəzaları zamanı yaranan fövqəladə hallar və onların idarə olunması” mövzusunda elmi-texniki konfrans keçirilib. 

Əvvəlcə Vətən uğrunda canını fəda edən şəhidlərimizin, Ulu Öndərin xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib. 

AzMİU-nun rektoru professor Gülçöhrə Məmmədova çıxış edərək konfrans iştirakçılarını salamlayıb və qeyd edib ki, 2023-cü ildə universitetdə təşkil olunan mühüm tədbirlərin böyük əksəriyyəti Ulu Öndərin anadan olmasının 100 illiyinə həsr olunub: “Əlbəttə ki, bu təsadüfi hal deyil. Çünki ölkəmizdə əldə etdiyimiz bütün uğurların təməli Ulu Öndərin dövründə qoyulub. Torpaqlarımızın işğaldan azad olunması, ərazi bütövlüyümüzün bərpası son 100 ildə əldə etdiyimiz ən böyük nailiyyətdir. Şübhəsizdir ki, bu nailiyyətimiz də Ulu Öndər tərəfindən əsası qoyulan və Prezident İlham Əliyev tərəfindən aparılan uğurlu siyasətin məntiqi nəticələridir”. 

Rektor çıxışında konfransın mövzusunun aktuallığına diqqət çəkərək AzMİU-da fövqəladə hallar və onların idarə olunması istiqamətində aparılan tədqiqat işlərindən, bu istiqamətdə kadr hazırlığı prosesindən də danışıb. Professor Gülçöhrə Məmmədova qeyd edib ki, günümüzdə ən çox baş verən hadisələrdən biri olan və təəssüf doğuran nəqliyyat qəzalarının nəticələrinin aradan qaldırılması, bu qəzalar zamanı yarana biləcək fövqəladə halların idarə edilməsi ilə bağlı məsələlər AzMİU üçün prioritet tədqiqat istiqamətlərindən biridir. 

AzMİU-nun Fövqəladə hallar və həyat fəaliyyətinin təhlükəsizliyi kafedrasının müdiri, AMEA-nın müxbir üzvü İslam Mustafayev çıxışında bildirib ki, Azərbaycanda müki müdafiənin təşkili və ölkəmizin ümumdünya mülki müdafiə təşkilatına üzv olması Ümummilli Liderin Respublikaya rəhbərliyi dövrünə təsadüf edir. Fövqəladə hallar və həyat fəaliyyətinin təhlükəsizliyi ilə bağlı aparılan tədqiqatlara, qazanılan təcrübəyə diqqət çəkən alim qeyd edib ki, ölkəmizdə həyata keçirilən sosial-iqtisadi layihələr, Azərbaycanın ümumi inkişafı mülki müdafiə sahəsini də inkişaf etdirib.   

Milli Aviasiya Akademiyasının “Nəqliyyat Texnologiyaları” fakültəsinin dekanı dosent N.Nağıyev və Azərbaycan Dövlət Neft və Sənaye Universitetinin "Sənaye təhlükəsizliyi və əmək mühafizəsi" kafedrasının müdiri professor S.Rəsulov da çıxışlarında Ulu Öndərin rəhbərliyi ilə Azərbaycanın inkişafı naminə həyata keçirilən geniş miqyaslı layihələrdən danışıb və nəqliyyat qəzaları zamanı fövqəladə halların idarə olunmasının vacibliyinə diqqət çəkiblər. 

Çıxışlardan sonra “Avtomobil qəzaları zamanı yaranan fövqəladə halların idarə olunması”, “Avtomobil qəzaları zamanı yaranan fövqəladə hallarda xilasetmə işləri”, “Dəniz nəqliyyatında qəzalar zamanı yaranan fövqəladə halların idarə olunması” və “SOCAR yükdaşımalarında qəzalar zamanı yaranan fövqəladə halların idarə olunması” mövzularında məruzələr dinlənilib. 

Konfrans bölmə iclasları ilə davam etdirilib. 

AzMİU,

AMEA-nın Radiasiya Problemləri İnstitutu 

Müəlliflərin nəzərinə

Konfrans materialı əvvəl nəşr olunmayan, digər çap və ya elektron nəşrlərdə olmayan yeni tədqiqat nəticələrini əks etdirməlidir. Tezis üç dildən birində (azərbaycan, ingilis və rus dillərində) qəbul edilir.

Nəşr üçün təklif olunan tezisin həcmi 2 səhifəyə qədər, A4 formatında, Microsoft Word mətn redaktorunda Times New Roman 12 şriftlə yığılmalı, səhifənin parametri hər iki tərəfdən- 2sm olmalı, abzasda 1 sm boşluq olmalı və sətirlər arası interval eyni olmalıdır.

Konfrans materialının məzmunu aşağıdakı ardıcıllıqla müəyyən edilməlidir:

1. Tezisin adı (mərkəzdə qalın şrift ilə) 12 sözdən çox olmamalıdır;

2. Hər bir müəllifin soyadı, adı və atasının adı, qrup nömrəsi, rəhbərin elmi adı və elmi dərəcəsi (əgər varsa); Müəlliflərin sayı 3 nəfərdən çox olmamalıdır;

3. İşin mahiyyətini və əldə edilmiş nəticələrini əks etdirən, çox qısa formada annotasiya.

4. Mətnin əsas mənasını daşıyan Açar sözlər (4-5 söz)

5. Tezisin sol yuxarı künçündə təqdim edilən bölmə qeyd olunsun.

 

AzMİU,

AMEA-nın

 Radiasiya Problemləri İnstitutu 

26-27 Oktyabr 2023
AzMİU,
A.Sultanova 11